1 John 2

SAMA ko, mepukat i intin won komail, pwe komail de wia dip, a ma amen wia dip, sauasa patail mia ren Sam, Iesus Kristus, me pun.

Iei me tom en dip atail, a kaidin atail ta, pwe pil en toun sappa karos.

I me kitail dedeki, me kitail asaer i, ma kitail kapwaiada kusoned akan.

Me inda: I asa i, ap sota kapwaiada a kusoned akan, i me likam amen, melel sota mi re a.

A me kapwaiada a masan, i me limpok en Kot unsokelar re a, i me kitail asaki, me kitail udan sapwilim a.

Me kin inda: I potopot re a, mak eta, i en weweid wei dueta a kotin weweidier.

Kompok kan, kaidin kusoned kap eu, me i intin won komail, a kusoned en mas o, me mi re omail san ni tapi o. Kusoned en mas, iei masan o, me komail roner.

Pil eu kusoned kap, me i intin won komail, me melel re a o re omail, pwe rotorot mur tikitikla, a marain melel ap dakadar.

Me inda, me a mi ni marain, ap kailon kin ri a, nan a mimieta ni rotorot lel met.

Me kin pok on ri a, pan mimieta ni marain, ap solar men kamakar mi re a.

A me kin tataki ri a, ni rotorot, o weweid ni rotorot, ap kin sasa, wasa a kin ko on ia, pwe rotorot karotonala mas a kan.

I intin won komail, sama ko, pwe dip omail lapwadar ki mar a.

I intin won komail, sam atail, pwe komail asa i, me kotikot eta san ni tapi o. I intin won komail manakap akan, pwe komail kaloedier me sued o. I intin won komail er, sama ko, pwe komail asaer Sam.

I intin won komail er, sam akan, pwe komail asa i, me kotikot san ni tapi o. I intin won komail er, manakap akan, pwe komail me kelail, o masan en Kot en mimieta re omail, o komail kaloedier me sued o.

Der pok on sappa, de dipisou mimi sappa. Ma amen pok on sappa, limpok en Sam me sota mi re a.

Pwe meakaros mi sappa, inon en ni uduk, o inon en ni mas oko, o linan mal en maur, a sota lapida san ren Sam, a san ni sappa.

A sappa pan sorola o a me sued akan, a me wia kupur en Kot, pan mimieta kokolata.

Sama ko, metet imwin auer o, o duen omail roner, me kristus likam pan pwarado, nan ansau wet kristus likam me toto, me pwaradar, i me kitail asaki, met imwin auer leler.

Irail me kola san kitail, a kaidin kis atail, pwe ma irail kis atail, re pan mimieta re atail. A irail kola san kitail, pwen sansal, me kaidin irail karos kis atail.

A komail keidier ren me saraui, o komail asaer meakaros.

I sota intin won komail er, dene sota asa duen melel, a pwe komail asa, o likam so tapida san ni melel.

Is me likam amen? Kaidin i, me kamamada me Iesus udan Kristus. I me kristus likam, me kamama kida Sam o Na.

Amen amen, me kamam kida Na, nan Sam pil sota mi re a, a me ponasa Na, i me pil sapwilim en Sam.

Me komail roner san ni tapi o, en potopoteta re omail. Ma a pan mimi re omail, me komail roner san ni tapi o, komail ap pil pan potopot ren Na o Sam.

A iet inau o, me a kotin inauki on kitail er: Maur soutuk.

Mepukat me i intin won komail er duen irail, me kasapune komail.

A omail kei, me komail aleer re a, pan mimieta re omail. Komail ap solar mau on, amen en padaki on komail. A duen kei wet kin padaki on komail meakaros, iduen me melel, a kaidin likam pot, o duen a padaki on komail er, iduen komail en dadaurata.

Ari sama ko, podidi on i, pwe ni a pan kotin pwarado, kitail en aima, a so namenok mo a, ni a kotin pwarado.

Ma komail asa, me i me pun, komail en pil asa, meamen, me wia me pun, me ipwi san i er.